ओखलढुंगा । पात्ले शेर्पा किदुग अर्थात पात्ले ओखलढुंगा शेर्पा समाज सेवा, काठमाडौंको पहलमा ८२ बर्षका एक बृद्धले नागरिकता र सामाजिक सुरक्षा भत्ता प्राप्त गरेका छन् ।
ओखलढुंगा जिल्लाको मोलुङ ७ पात्लेका ८२ बर्षिय निमा शेर्पाले नेपाली नागरिकता प्राप्त गरेसँगै सामाजिक सुरक्षा भत्ता समेत प्राप्त गरेका हुन् । व्यवरिसे अवस्थामा राजधानी काठमाडौं बस्दै आएका शेर्पाको पात्ले शेर्पा किदुगका अध्यक्ष पासाङदावा शेर्पाको अगुवाईमा केही समय अघि उद्धार गरेको थियो । उद्धार पश्चात्् स्थानी प्रशासनसँगको समन्वयमा आफन्त खोजी शेर्पालाई नागरिकता दिलाएको र हालै सामाजिक सुरक्षा भत्ता मासिक वापत ४ हजार रुपैयाँ प्राप्त गरेको कोषाध्यक्ष छेपाल शेर्पाले जानकारी दिनुभयो ।
नागरिकता र पहिचान खुल्ने कागजात नहुँदा शेर्पा वेवारिसे बनेका थिए । आर्थिक अभावका कारण सडकमा पुगेका शेर्पाको उद्धारका लागि आदिवासी जनजाति महासंघका पूर्व महासचिव आङकाजी शेर्पा किसानले समेत पहल थालेका थिए ।
उद्धारपछि वडा मोलुङ ७ का वडा अध्यक्ष हेमबहादुर सुनुवार, किदुगका पदाधिकारीले शेर्पालाई जिल्लामा लगेर नागरिकता प्रमाण पत्र बनाई दिएको र सामाजिक सुरक्षा भत्ता भने राजधानीमा नै उपलब्ध गराएको कोषाध्यक्ष शेर्पाको भनाई छ ।
सामाजिक सुरक्षा भत्ता प्राप्त हुन थालेपछि जिवनयापनका लागि आफूलाई सहज हुने शेर्पाको भनाई छ । राजधानीको कपन क्षेत्रको एक आश्रममा वस्न थालेको शेर्पाले कानूनी प्रकृया, व्यवहारिक लगायत कारणले घरपरिवार र गाउँ छोड्नु परेकाले समयमै नागरिकता लिन नपाएको बताउनुभयो । किदुगका पदाधिकारी, जनप्रतिनिधि र नागरिक समाजको अगुवाहरुले आफ्नो उद्धार गरेर ठूलो मानवीय गुण लगाएको भन्दै शेर्पाले खुसी व्यक्त गर्नुभयो ।
पात्ले शेर्पा किदुगु ओखलढुंगाको पात्ले लगायतका क्षेत्रबाट काठमाडौंमा आई बसोबास गर्नेहरुको साझा सामाजिक संस्था हो । संस्थाले सुख, दुखमा सहयोग गर्ने, धार्मिक, सांस्कृतिक, भाषिक र पहिचान जन्य कार्यहरुका साथमा राहत, उद्धार र विपतिमा परेकाहरुलाई सहयोग गर्दै आएको छ ।
