ओखलढुंगा । जिल्लाको खिजीदेम्बा गाउँपालिका वडा न ९ पात्लेमा एक जीर्ण गुम्बाभित्रको धार्मिक ग्रन्थ र मूर्तिहरु सुरक्षित स्थानान्तरण गरेको छ । स्थानीय र गुम्बा व्यवस्थापन समितिले बर्षातको समयमा जीर्ण गुम्बाभित्रको बौद्ध धार्मिक ग्रन्थ (पस्तुक), विभिन्न मूर्ति र गुम्बाभित्रका पूजा सामाग्रीलाई सुरक्षित रुपमा नयाँ गुम्बाभित्र स्थानान्तरण गरेको हो ।
२०७२ को भूकम्पले जीर्ण बनेको फाप्रे छेर्मादिङ्ग देच्यान छोकुर छोलिङ गुम्बा डाँडाकटेरीका सामाग्रीहरु नयाँ गुम्बाभित्र स्थानान्तरण गरिएको गुम्बा व्यवस्थापन समितिका अध्यक्ष मिङ्गमार शेर्पाले जानकारी दिनुभयो । बर्षातसँगै पुरानो गुम्बा थप जीर्ण हुने र बहुमूल्य सामाग्रीहरुमा क्षति पुग्ने अवस्थालाई ध्यानमा राख्दै भरखरै निर्माण गरिएको नयाँ गुम्बाभित्र सारिएको अध्यक्ष शेर्पाको भनाई थियो ।
२०५७ सालमा स्थानीयहरुले निर्माण गरेको ढुंगामाटोले बनेको गुम्बा भूकम्पले जीर्ण बनेको थियो । कुनैपनि सरकारी तहमा पुनः निर्माण र संरक्षणको लागि पहल गरेपनि चासो नदेखाएपछि स्थानीयहरुले नै आर्थिक सहयोग संकलन गरी भूकम्प प्रतिरोधी नयाँ गुम्बा निर्माण गरी सामाग्रीहरु सारिएको व्यवस्थापन समितिका सचिव आङ्ग दावा शेर्पाले जानकारी दिनुभयो । स्थानीयहरुको श्रमदान, अमेरिकामा बसोबास गर्ने नेपालीहरुसँग स्थानीय ओङछु शेर्पाको संयोजकत्वमा र मकाउमा ङावाङ गेल्जे शेर्पाको संयोजकत्वमा संकलित सहयोग रकमबाट नयाँ गुम्बा निर्माण सम्पन्न गरेको निर्माण समितिका सचिव मिङमार डि शेर्पाले जानकारी दिनुभयो । नयाँ गुम्बा निर्माणका लागि स्थानीय ङावाङ छोजाङ शेर्पाले जग्गा उपलब्ध गराउनु भएको थियो ।
नयाँ गुम्बामा सामाग्री स्थानान्तरनसँगै प्रमुख लामा ङावाङ साम्तेन लामा शेर्पाको अगुवाईमा विधिपूर्वक पूजापाठ तथा क्षमा पूजा सम्पन्न गरेको जनाइएको छ । कार्यक्रममा स्थानीय बौद्धमार्गी भक्तजनहरुको बाक्लो उपस्थिती रहेको थियो । हाललाई सामाग्रीको सुरक्षालाई ध्यानमा राखेको र छिट्टै गुम्बा तथा नजिकै निर्माण भएको बौद्ध स्तुपाको प्राण प्रतिष्ठा गर्ने कार्यक्रम समेत रहेको वडा अध्यक्ष ङावाङ फुरी शेर्पाले जानकारी दिनुभयो ।