राजनैतिक मुद्धासहित विकासका अनेकन योजनाहरु लिएर आफू आएपनि समाजको चेतना भने उठि नसकेको निर्वाचनको क्रममा आफूले महशुस गरेको शेर्पाको भनाइ थियो । अध्यक्ष शेर्पाले चुनाव अघि र मतदानको अघिल्लो दिनसम्मको महोल हेर्दा आफूले दुई तिहाई बढी मत ल्याएर जित्ने आँकलन गरेपनि नतिजा भने सोच जस्तो प्राप्त नगरेको भन्दै असन्तुष्टि समेत पोखे । उनले भने ‘तर, अब म सबैको नेता हुँ, समग्र गाउँपालिकाको अध्यक्ष भएको हैसियतले कसैलाई लाखापाखा नगरी काम गर्छु । पार्टीगत, व्यक्तिगत रुपमा लाग्ने छैन  ।’
क्रमागत रुपमा विकासका कार्यक्रमहरु अघि बढाउने उल्लेख गर्दै अध्यक्ष शेर्पाले संघ, प्रदेश, दातृ निकाय र आन्तरिक स्रोत परिचालन गर्ने र सबै शक्ति प्रयोग गरेर समृद्ध खिजीदेम्बाको सपना पूरा गरेरै छाड्ने भनाइ राखे । विगतका सरकार हात थापेर बसेको आरोप लगाउँदै शेर्पाले भने ‘अब हात थापेर बस्ने हैन, हात हालेर बजेट र योजना लिएर आउने हो । त्यो सामथ्र्य मसँग छ ।’
 

स्थानीय सरकार आएसँगै भ्रष्टाचार र आर्थिक सुशासन कमजोर हुँदै गएको तर्फ इंगित गर्दै अध्यक्ष शेर्पाले गाउँपालिकामा यस्ता विकृतीहरु रहेको तर अब त्यस्ता खाले कुकृत्य गर्नेहरुलाई अघि बढ्न नदिने बताए । सामाजिक रुपान्तरण, आर्थिक विकाससँगै जातजाति, संस्कार संस्कृति, परम्परागत मान्यताहरुलाई स्थापित गर्ने खाले नीति बनाएर अघि बढ्न आफू लागी पर्ने शेर्पाको भनाइ थियो । 
चौमासिक रुपमा वडागत अनुगमन, निरीक्षण गर्ने, विकासको अवस्था र आवश्यकता पहिचान गरी काम गर्ने बताउँदै अध्यक्ष शेर्पाले त्यसका लागि राजनैतिक दलीय विचार भन्दापनि सहकार्य गरेर अघि बढ्न नवनिर्वाचित जनप्रतिनिधीहरुलाई आह्वान गरे । 
कार्यक्रममा लामो मन्तव्य राखेका शेर्पाले आजसम्म भाषण गर्ने र पदभार ग्रहण गरे लगतै काममा लाग्ने बताए । अनेकन संभावना बोकेको खिजीदेम्बालाई विकासको नयाँ खाका दिने क्रममा आफ्नो पहिलो प्रथामिकता सडक कालोपत्रे, चण्डेश्वरीमा रहेको विमानस्थललाई सञ्चालन र स्तरोन्नती रहेको समेत प्रष्ट पारे ।