केचनकवलदेखि सगरमाथासम्म जसपा संगठन विस्तार तिब्र

मिङमार शेर्पा

२०७८ बैशाख २३, विहिबार


काठमाडौं (शेर्पाखबर) । आफूलाई वैकल्पिक राजनैतिक शक्ति दाबी गर्दै आएको जनता समाजवादी पार्टी नेपालले संगठन विस्तारलाई तिब्रता दिएको छ । विशेष गरी मधेशवादी पार्टीको रुपमा प्रतित गर्दै आएको जसपा नेपालले संगठन पहाड, हिमालमा समेत तिब्र बनाएको हो । 
उक्त पार्टीका केन्द्रीय सदस्य तथा सोलुखुम्बु जिल्ला इन्चार्ज लाक्पा शेर्पाले हालै सोलुखुम्बुको खुम्बुपासाङल्हमु गाउँपालिकामा संगठन विस्तार गर्दै यसलाई पुष्टि गरे । उनले संगठन घोषणा कार्यक्रममा भने “हामी तराईदेखि हिमालसम्म संगठन तिब्र विस्तारमा छौं । तराईको केचनकवलदेखि सगरमाथासम्म हामी पार्टी संगठन विस्तार अभियानमा सफल पार्दैछौं । मुलुकभरी हाम्रो संगठन विस्तार उत्साहजनक छ । हामी उत्साहित छौं ।”
 

मुलुकको वैकल्पीक राजनैतिक शक्तिको रुपमा आफूहरु स्थापित भएको संगठन विस्तारको लहरबाट पुष्टि हुने अर्का केन्द्रीय सदस्य जुद्ध ढाक्रेले दाबी गरे । “जनता समाजवादी पार्टीको विचार, सिद्धान्त र नीति अन्य राजनैतिक दलको भन्दा भिन्न छ । त्यसैले, यो पार्टीमा जनआकर्षण बढेको छ । पार्टी प्रवेश गर्ने र हामीलाई माया गर्ने जनलहरले त्यो सिद्ध हुन्छ ।” नेता ढाक्रेले अघि भने “यो पार्टीमा सबै जाति, भाषा, लिंग, समुदाय, धर्मलाई समान र सम्मानजनक स्थान प्राप्त हुन्छ । त्यस्तैले पनि जनलहर बढेको हो ।”
तराईमधेशमा मात्रै नभएर पहाडी क्षेत्रमा र विशेष गरी हिमाली क्षेत्रमा वसोवास गर्नेहरु आफूलाई राज्यले राजनैतिक अधिकार प्राप्तिबाट विमूख गरेको र राज्यको अनुभूत गराउने नीतिसहित आफूहरु अघि बढेकाले जनताको आकर्षण बढेको जसपाका नेताहरु दाबी गर्छन । 
संघीयताको जन्मदाता ठान्ने जसपाले संघीयताको प्रभावकारी कार्यान्वयनका लागि पनि जनताले वैकल्पिक शक्तिको पक्षमा वकालत गर्न थालेको बताउँछन् । पहिचानसहितको अधिकार, प्रत्यक्ष निर्वाचित कार्यकारी राष्ट्पति प्रणाली, सुशासन, समावेशी, लोककल्याणकारी राज्यको अवधारणलाई अघि सारेको जसपाले जस्तो समाज त्यस्तै राज्य व्यवस्था स्थापना गर्ने दाबी गर्दै आएका छन् । विशेष गरी उत्पीडित वर्गका लागि आफूहरु राजनैतिक रुपमा क्रियाशिल हुने बताउने पार्टीले सुशासन, समृद्धी, संघीयता र समाजवाद भन्ने नारा अघि सारेका छन् ।
पछिल्लो समय ओखलढुंगाको खिजीदेम्बाबाट पार्टी प्रवेश र संगठन विस्तार शुरु गरेपछि देशैभर आफूहरुको पक्षमा महोल बन्दै गएको र आगामी निर्वाचनमा पार्टीले निश्चित आकार लिने पार्टीका कार्यकारिणी सदस्य राजेन्द्र श्रेष्ठ बताउँछन् । एक कार्यक्रममा उनले भने “अब हामी बैकल्पीक राजनैतिक शक्तिको रुपमा स्थापित भइसक्यौं । अबको निर्वाचनमा हामी केही नभएपनि दोस्रो स्थानमा आउँछौं । जनताहरु बुझ्ने भइसके । अन्याय, अत्याचार र हिजोको जस्तो विभेदको दबदबामा सहने अवस्था अब छैन ।”
खिजीेदेम्बामा गम्बु शेर्पाको नेतृत्वमा पार्टी प्रवेशपछि त्यहाँको टोलटोलमा पार्टी कमिटी गठन भएको ओखलढुंगा जिल्लाका तत्कालिन अध्यक्ष नेत्रबहादुर नेम्बाङले जानकारी दिए । त्यस्तै, जिल्लाको मानेभन्ज्याङ, चिसंखुगढी लगायतको गाउँपालिकामा पनि उत्साहजनक रुपमा पार्टी प्रवेश तथा संगठन विस्तार तिब्र बनाएको प्रदेश सदस्य धीरेन्द्र रुम्दाली बताउँछन् । 
सोलुखुम्बुको लिखुपिके गाउँपालिका आगामी स्थानीय तहमा जित निकाल्ने स्थानीय तहको रुपमा तयार रहेको सोलुखुम्बु जिल्ला अध्यक्ष नरेन्द्र थापामगर दाबी गर्छन । सोलुखुम्बुममा संगठनको अवस्था सुदृढ हुँदै गएकाले आगामी निर्वाचनमा आफूहरु सम्मानजनक अवस्थामा पुग्ने केही समयअघि त्यहाँ आयोजित पार्टी प्रशिक्षणका क्रममा अध्यक्ष मगरले गरे ।
 

यता, खिजीदेम्बामा गाउँपालिकामा नतिजा निकाल्ने अभियानमा आफूहरु अहोरात्रा खटिरहेको जसपा जिल्ला सचिव पासाङ निमा शेर्पा बताउँछन् । उता खोटाङमा आफ्नै जिल्ला कार्यालय भवन नै बनाएर पार्टी संगठन तिब्र रुपमा अघि बढेको युवा नेता रविन खम्बुले बताए । 
ओखलढुंगामा पत्रकार महासंघको नेतृत्वसमेत जसपा निकट प्रेस मञ्च नेपालले जितेका छन् । देशैभरमध्ये प्रदेश नं. १ मा मञ्चका उपमहासचिव दीपेन्द्र रुम्दालीले केन्द्रीय सदस्यमा निर्वाचित हुनुपनि पार्टीका लागि महत्वपूर्ण उपलब्धि भएको पार्टी केन्द्रीय सदस्य राजकुमार राई बताउँछन् । 
तराईमधेशमा राम्रो प्रभाव रहेको, पहाडी र हिमाली क्षेत्रमा समेत तिब्र रुपमा जनलहर देखिएपछि अन्य पार्टीले हेर्ने दृष्टिकोण समेत परिवर्तन भएको ओखलढुंगाका अध्यक्ष खेमराज खड्का बताउँछन् । स्थानीय तहको निर्वाचन नजिँकिँदै जाँदा पार्टी संगठन विस्तारले पाएको तिब्रताले जसपाका नेता कार्यकर्ता उत्साहित भइरहँदा केन्द्रीय राजनीतिमा पार्टीको दुई खेमा र सरकार निर्माण ठोस निर्णय दिन नसक्नुलाई भने कमजोरीको रुपमा हेरेका छन् । पार्टी प्रदेश नं. १ का कोषाध्यक्ष विनोद नेम्बाङले भने “हाम्रो नेतृत्व अहिले कस्तुरीले आफ्नै विना नचिने जस्तो अवस्थामा छ । यसरी पार्टी निर्माणमा घाटा हुन्छ तसर्थ तत्काल कित्ता स्पष्ट गरेर अघि बढ्नुको विकल्प छैन ।” 
 

Please suscribe Sherpa Khabar

Maya Ko Jal

Chatyang

Ghaam Chaya

Dui Kinara

Sarangi

Pool Pani Maya Bho