पत्रकारको तलब ५० प्रतिशत बढाउन प्रस्ताव

शेर्पाखबर

२०७५ भाद्र २५, सोमबार


काठमाडौं । न्यूनतम पारिश्रमिक निर्धारण समितिले विभिन्न सञ्चार प्रतिष्ठानहरुमा कार्यरत श्रमजीवी पत्रकार, कर्मचारी तथा कामदारहरुको पारिश्रमिकमा पुनरावलोकन गर्दै नयाँ तलवमान सिफारिस गर्ने निर्णय गरेको छ । यही भदौ २४ र २५ गते दुई दिन सम्म काठमाडौंमा सम्पन्न समितिको बैठकले श्रमजीवी पत्रकार, कर्मचारी एवं कामदारहरुको पारिश्रमिकमा ५० प्रतिशतको हाराहारीमा वृद्धि गरी नयाँ तलवमान सिफारिस गर्ने निर्णय गरेको हो ।

२०७२ को असारमा समितिले सिफारिस गरेको पारिश्रमिक दरमा ३ वर्षपछि २०७५ भदौमा मात्र पुनरावलोकन गरिएको समितिका अध्यक्ष गंगाधर पराजुलीले जानकारी दिनुभयो । यसपटक समितिले श्रमजीवी पत्रकार, कर्मचारी र कामदारको पारिश्रमिक पुनरावलोकनका लागि सञ्चार प्रतिष्ठानको क्षमता, तिनको श्रेणी र तहलाई समेत आधार बनाएको छ ।

यसबाहेक श्रमजीवीको जिवनयापनका लागि चाहिने न्यूनतम आधारभूत आवश्यकता, देशको मौद्रिक अवस्थामा आएको उतारचढाव, निजामती सेवा एवं अन्य निजी प्रतिष्ठानहरुमा कार्यरत श्रमजीवीहरुको पारिश्रमिकको तुलनात्मक अवस्था सञ्चार प्रतिष्ठानहरुको क्षमता, केही समय अगाडि नेपाल सरकारले विभिन्न औद्योगिक तथा व्यवसायिक प्रतिष्ठानमा कार्यरत श्रमजीवीहरुको न्यूनतम पारिश्रमिकमा गरिएको वृद्धि तथा मुलुकको समग्र आर्थिक अवस्थालाई मध्यनजर गरी पारिश्रमिक पुनरावलोकनको निर्णय गरिएको अध्यक्ष पराजुलीले जानकारी दिए ।

समितिले पत्रपत्रिकालाई राष्ट्रिय, प्रादेशिक र स्थानीय गरी तीन तह र त्यसमा पनि तीनवटा श्रेणीमा विभाजन गरी पारिश्रमिक पुनरावलोकन गरेको छ । एफएम/रेडियोहरुलाई १०० वाटसम्म, ५०० वाटसम्म र त्यसभन्दा बढी क्षमताको गरी तीन श्रेणीमा तथा टेलिभिजनको हकमा स्याटेलाइट र केबुल टेलिभिजन गरी दुई श्रेणीमा विभाजन गर्ने सुझाव पेश गरेको छ ।

अनलाइन मिडियालाई हालसम्म सरकारी तवरबाट कुनै वर्गीकरण नगरिएकोले राष्ट्रिय, प्रादेशिक वा स्थानीय कुन श्रेणीमा रहने हो, स्वघोषणा गरी सोही अनुसार श्रमजीवीलाई पारिश्रमिक उपलब्ध गराउन पनि समितिले सुझाव दिएको छ । समितिले पुनरावलोकन गर्न प्रस्ताव गरेको नयाँ पारिश्रमिक दर अनुसार क वर्गमा पर्ने राष्ट्रिय स्तरका पत्रपत्रिकामा कार्यरत श्रमजीवी पत्रकारहरुका लागि २९ हजार ५ सय रुपैयाँ, ख वर्गमा पर्ने राष्ट्रिय स्तरका पत्रपत्रिकामा कार्यरत श्रमजीवी पत्रकारहरुका लागि २७ हजार ५ सय र ग वर्गमा पर्ने राष्ट्रिय स्तरका पत्रपत्रिकामा कार्यरत श्रमजीवी पत्रकारहरुका लागि २४ हजार ५ सय न्यूनतम पारिश्रमिक तोकिएको छ ।

यस्तै प्रादेशिक स्तरका पत्रपत्रिकामा कार्यरत श्रमजीवी पत्रकारहरुको हकमा भने क वर्गका लागि २१ हजार ५ सय, ख वर्गको हकमा २० हजार र ग वर्गको हकमा १८ हजार रुपैयाँ न्यूनतम पारिश्रमिक तोकिएको छ । यस्तै स्थानीय स्तरका पत्रपत्रिकामा कार्यरत श्रमजीवीका लागि क, ख र ग वर्गमा समावेश भएकालाई क्रमशः १८ हजार, १७ हजार र १६ हजार न्यूनतम पारिश्रमिक तोकिएको छ ।

यसैगरी ५०० वाट भन्दा बढी क्षमताका रेडियोमा कार्यरत श्रमजीवी पत्रकारको लागि २९ हजार पाँच सय, ५०० वाट क्षमतासम्मका रेडियोमा कार्यरत श्रमजीवीका लागि २१ हजार पाँच यस र १०० वाटसम्म क्षमताका रेडियोमा कार्यरत श्रमजीवी पत्रकारका लागि १८ हजार रुपौयाँ मासिक न्यूनतम पारिश्रमिक तोकिएको छ ।

टेलिभिजन प्रतिष्ठानहरु मध्ये स्याटलाइट टेलिभिजनमा कार्यरत श्रमजीवी पत्रकारको लागि न्यूनतम पारिश्रमिक २९ हजार पाँच सय र केबुल टेलिभिजनमा कार्यरत श्रमजीवी पत्रकारको लागि २१ हजार पाँच सय निर्धारण गरिएको छ । स्याटेलाइट प्रसारण हुने टेलिभिजनलाई छापा माध्यमको राष्ट्रिय क वर्ग र केबुल टेलिभिजनलाई प्रादेशिक क वर्ग सरह मानेर उक्त पारिश्रमिक निर्धारण गरिएको हो ।

सबै खाले संचार प्रतिष्ठानमा कार्यरत श्रमजीवी पत्रकारहरुलाई न्यूनतम पारिश्रमिक रकमका अतिरिक्त १ हजार रुपैंया संचार खर्च वापत उपलब्ध गराउनुपर्ने निर्णय पनि बैठकले गरेको छ । यस अगाडि ऐन पूर्ण कार्यान्वयन हुने संचारप्रतिष्ठानका लागि १९ हजार पाँच सय र अन्य संचार प्रतिष्ठानका लागि १४ हजार १ सय रुपैंया न्यूनतम पारिश्रमिक तोकिएको थियो ।

यसैगरी स्ट्रीन्जर समाचारदाताको हकमा राष्ट्रिय स्तरका संचार प्रतिष्ठान मध्ये पत्रपत्रिकामा प्रति समाचार २ सय २५ बाट बढाएर ३ सय ५० र रेडियोहरुमा २ सय बाट बढाएर ३ सय तथा टेलिभिजनहरुमा ६ सयबाट बढाएर ९ सय पु¥याउने तथा प्रादेशिक तथा स्थानीय मिडिया अन्तरगत पत्रपत्रिकामा १ सय ५० बाट २ सय २५, रेडियोमा १ सय ५० बाट २ सय २५ र टेलिभिजनमा ६ सय बाट बढाएर ७ सय ५० पु¥याउने निर्णय गरिएको छ ।

संचारप्रतिष्ठानमा कार्यरत कामदार, कर्मचारीहरुको पारिश्रमिकमा पनि समितिले पुनरावलोकन गरेको छ । जसअनुसार राष्ट्रिय मिडिया अन्तरगत क वर्गका लागि २१ हजार ५ सय ख वर्गका लागि २० हजार ५ सय र ग वर्गका लागि २० हजार ५ सय तय गरिएको छ ।

यस्तै प्रादेशिक मिडियामा काम गर्नेहरुको लागि क्रमशः क वर्गका लागि १९ हजार, ख वर्गका लागि १८ हजार र ग वर्गका लागि १६ हजार रुपैयाँ तय गरिएको छ । स्थानीय मिडियामा कार्यरत कर्मचारीका लागि क, ख र ग वर्गका लागि क्रमशः १६ हजार, १५ हजार र १४ हजार रुपैयाँ न्यूनतम पारिश्रमिक निर्धारण गरिएको छ ।

बैठकले संचार प्रतिष्ठानहरुले श्रमजीवी पत्रकार एवं कामदार कर्मचारीको पारिश्रमिक बैंकिङ प्रणाली मार्फत् भुक्तानी गर्ने व्यवस्था मिलाउन र हाल पुनरावलोकन गरिएको पारिश्रमिकलाई सम्बन्धित संचारगृहको तल्लो तहमा काम गर्ने श्रमजीवीको पारिश्रमिक मानेर संचार प्रतिष्ठानमा तहगत वर्गीकरण सहित पारिश्रमिक पुनरावलोकन गर्न एक कार्यदल समेत गठन गर्ने निर्णय गरेको छ । यसका साथै विभिन्न संचार प्रतिष्ठानहरुमा ५ वर्षसम्म नियमित रुपमा स्ट्रिन्जरको रुपमा काम गरेका श्रमजीवी पत्रकारहरुलाई न्यूनतम पारिश्रमिकको व्यवस्था गर्न समेत सम्बन्धित संचार प्रतिष्ठानहरुलाई सुझाव दिने निर्णय बैठकले गरेको छ ।

@दैनिकनेपालबाट

Please suscribe Tribeni Nepal to watch more nepali movies and songs.

Maya Ko Jal

Chatyang

Ghaam Chaya

Dui Kinara

Sarangi

Pool Pani Maya Bho